كل شيء ضاع من ايديكي
و الدموع اللي ف عينيكي
اعتراف انك خسرت
ارجعيله لو قدرت
متلوميش قلبه اللي خدعك
لومي ضعفك لومي طمعك
اشتري عينيه اللي باعوا
صدقي كدبه و خداعه
عيشي للآخر حكايته
كملي الوهم لنهايته
انت بالنسبة له لعبة
و اشتياقه ليكي كدبة
انتصار يرضي غروره
و ببراعة أدىّ دوره
و اما قلبك دق بابه
ابتدت رحلة عذابه
و اما حس ان انت ملكه
ساب عينيكي ف ليلة يبكوا
باع هواكي و راح لغيره
قلب تاني يكون مصيره
زي مليون قلب قابله
انجرح من يوم ما قابله
هيّ دي هوايته الوحيدة
كل يوم قصة جديدة
و انت ليه بس اتوهمت
بعد ايه فقت و فهمت
ان قلبي كان شاريكي
و ان قلبه اتسلى بيكي
للأسف فات الأوان
و الأسف ملهوش مكان
قبل ما تكوني ضحية
يوم جنى قلبك عليّ
بعت ليه يوم و بارادتك
جنتك حبك سعادتك
القرار دا كان قرارك
و الفراق كان باختيارك
و انت عارفة مستحيل
أرضى يوم دور البديل
مستحيل ادخل حياتك
تاني و ابقى طوق نجاتك
يعني مهما حتقوليلي
و بدموعك تندهيلي
قلبي مش ممكن يسامح
رافض انك ترجعيلي
***