دمعة واحدة من عينيكي
أغلى م الدنيا بحالها
يعني لو شمعة ف ايديكي
انطفت قيدي بدالها
ألف شمعة متنطفيش
بسمة حلوة متختفيش
دمعتك غالية مفيش
أي حاجة تستاهلها
*****
في ابتسامتك هل فجري
و ف هواكي الدنيا ملكي
يبقى لما الدمع يجري
فوق خدودك يوم و تبكي
لازم اسأل ده لأني
حاسس انك حتة مني
ليه تداري الحزن عني
و اسألك مش راضية تحكي
*****
ليه تمللي ف وقت حزني
بتلاقنيني جريت عليكي
ارمي أحزانك في حضني
قلبي حاسس نبضه بيكي
لو يقولو انسي كلامهم
خدنا ايه الا ملامهم
ليه بقى نعمل حسابهم
طول مانا ايديّ ف ايديكي
*****
1 comment:
كلماتك جميلة بتعبر عن احساس وحب صادق
واد اية قلبك مش قادر يحس بالراحه غير لما تعرف سبب حزن حبيبتك وانك تشعرها بالراحه وتبعد الحزن ده عنها
تسلم ايدك
Post a Comment